17 May dünyada Telekommunikasiya və İnformasiya Cəmiyyəti Günü kimi qeyd olunur.
Bu günün əlamətdar olması ilk Beynəlxalq Teleqraf Konvensiyasının imzalanması ilə Beynəlxalq Telekommunikasiya İttifaqının yaranmasının 1865-ci il 17 may tarixinə təsadüf etməsi ilə əlaqədardır.
Ümumdünya Telekommunikasiya və İnformasiya Cəmiyyəti Gününün builki mövzusu “Çətin dövrdə rəqəmsal transformasiyanın sürətləndirilməsi”dir.
Bu gün münasibətilə World Summit on the Information Society – İnformasiya Cəmiyyəti üzrə Ümumdünya Sammiti çərçivəsində yüksək səviyyəli virtual panel keçirilib.
Əsas məqsəd həm ölkələr arasında, həm də müxtəlif sektorlarda informasiya-kommunikasiya texnologiyaları (İKT) və telekommunikasiya sahəsində əməkdaşlığın daha da genişləndirilməsinin zəruriliyini vurğulamaqdır.
Paneldə Azərbaycan Respublikasının nəqliyyat, rabitə və yüksək texnologiyalar nazirinin müavini Elmir Vəlizadə də iştirak edib. Nazir müavini rəqəmsal transformasiyanın əhəmiyyətindən danışaraq zamanın çağırışlarına uyğun görülən və görüləcək işlər barədə məlumat verib.
Elmir Vəlizadə çıxışında işğaldan azad edilmiş torpaqlarda müasir texnologiyaların tətbiqi məsələlərinə də toxunub. “Ağıllı (smart) və yaşıl (green) texnologiyaların tətbiqi ilə işğaldan azad edilmiş ərazilərdə yerləşən şəhər və kəndlərin müasir texnologiyalar əsasında qurulacağı planlaşdırılır”, – deyə nazir müavini qeyd edib.
Panelin gedişində rəqəmsal texnologiyaların “COVID-19” pandemiyası zamanında rolu və sonrakı dövrdə fəaliyyətin hansı istiqamətdə inkişaf etdiriləcəyi ilə bağlı müzakirələr aparılıb.
Qeyd edək ki, Beynəlxalq Telekommunikasiya İttifaqı tərəfindən təsis edilmiş “World Summit on the Information Society Prizes 2021” – “İnformasiya Cəmiyyəti üzrə Ümumdünya Sammiti Mükafatları 2021” müsabiqəsinin nəticələrinin mayın 18-də açıqlanması gözlənilir. Beynəlxalq müsabiqəyə Azərbaycandan da bir sıra layihələr təqdim olunub.
